Starfsemin á Íslandi
Lótushús
Lótushús er hugleiðsluskóli sem starfræktur hefur verið frá árinu 2000, fyrst í Kópavogi en nú á Garðatorgi í miðbæ Garðabæjar. Einnig heldur skólinn reglulega námskeið á landsbyggðinni sé þess óskað.
Í Lótushúsi eru haldin hugleiðslu- og sjálfsstyrkingarnámskeið með reglulegu millibili allan ársins hring og hafa þúsundir Íslendinga sótt námskeið og viðburði á vegum skólans.
Ekkert gjald er tekið fyrir námskeiðin og er kostnaði mætt með frjálsum framlögum þátttakenda.
Lótushús tilheyrir alþjóðlegu samtökunum Brahma Kumaris World Spiritual University. Sjá nánar um alþjóðlegu starfsemina á brahmakumaris.org
Í heimi þar sem ytra áreiti eykst dag frá degi, er fátt mikilvægara en að gefa sér tíma til að staldra við og hlúa að eigin huga. Því má kannski segja að hugleiðsluiðkun sé ein sú dýrmætasta gjöf sem fólk getur gefið sjálfu sér í dag. Gengið er út frá að hugleiðsla eigi erindi við alla og lögð er áhersla á notagildi hugleiðslunnar í daglegu lífi.

Hvað táknar lótusblómið?
Lótusblómið táknar hreinleika hugar og hjarta. Lótusinn hefur ræturnar í moldinni en krónan flýtur ofan á vatninu, ómenguð af óhreinindum botnsins og snýr í átt til sólar. Á sama hátt getum við með hugleiðsluiðkun haldið huganum björtum og hreinum, handan neikvæðra áhrifa.